Maban

Tunai cha December 2008 a khan, ka seppi te Numei khat Romania ah um toh houlim na ka nei nau achun, hiti hin ei gen ah, kei uh Romania gam hih, khanglai te kingawl sak leh nawp chen in a um gam tau ah, kuama a maban ding uh gel le um lo in, anawp dan chiat uh leh a nawpthei tawp ah enjoy in maban khual a tawm mama ziang ui, hiti hih ka hi zel uh a hi chun, future chu zero hi mai ding dan ahi ti ei gen ahi chun, puaknat um mama ziang ahi.

Tulai i Zogam ua, khangdawng te hinkhua i et uh ahi chun, i kilamdan nau aum in ka hepuai, lungzin'n aum mama ka sai. A ziak chu, khamthei ah leh, Numei leh Tangval ah thangtat in i hinkhua te uh mat zaw gua hileu hin a kilawm mama ka sai. I Zogam sung ua hitaleh Pawtlam ah um, Gam dang ah khosa te le khenkhat te i hithou ui. A diak ah ei Vaiphei Nam te ka gen ut diak ahi. Puaknat um mama chu, i unau teu Paite chate leh a dang dang te chanchin News ah i sim uh chun, Dan ah Zi leh Pawsal nei ding bang, chuleh nasep na lian taktak muthak mu ding leh sim ding a um zing mai hi, himaleh ei Vaiphei chate vang a tawm ah sim ding le um zou ta lou i bat na chang uh bang a um tai. Bangziak pen hiding ahem, ei mau leh ei mau kidawt a kul tai. I Vaiphei nam sung ah Officer rank ah nasep na mu sang ah, Zudawn buai leh Tingnuai mi lam ah buai ding ah kiphal phal na lai ding i bang ui. I din mun uh a niam ah, zia sang ah niam sak zawk ding i guat uh ahi chun vang i umdan ngai ua umleu hin le a khawk puai, hiziang maleh tupna kichian nei ah, Nam leh Gam ngaina tak tak i hi uh ahi chun, khamthei leh ki muda na te i pai thak uh a kul tai. Mi ngawl i hi puai ah, mi banglou le i hi diak puai, himaleh i taksap uh chu Gunchuna leh Sephatna ahi... Ei thingtang mi Zogam ah um te haw lak in Chanchinpha pawtlut tu i kitiu ah, a semdawk tu leh ga sua tu hiding in le Khanglai te'n pan la tai teu. Khawvel kitai tek na in le hattak leh hangtak in pangzawm hitiu in, pan la thak hitiu. Ahivang in Ei Siamtu Pa Pathian lunglam bawl a masa pen in koi leu hin chu Nam leh Gam khantou na leh ki iit na te in ma hung suan ding ahi.